آزادجموں وکشمیر کے وزیر اطلاعات راجہ مشتاق منہاس نے کہا ہے کہ کنٹر ول لائن پر ہندوستان کی فوج کی جانب سے معصوم شہریوں کی ٹارگٹ کلنگ،مسافر بس،سکول وین،چھوٹے بچوں،بزرگوں اور عورتوں کی ٹارگٹ کلنگ بدترین دہشت گردی ہے۔ہندوستانی افواج انسانیت کے خلاف سنگین جرائم کی مرتکب ہورہی ہیں۔اقوام متحدہ سلامتی کونسل،یورپی یونین سمیت بااثر ممالک ہندوستانی افواج کی جانب سے معصوم شہریوں کے قتل عام پر فوری نوٹس لیں۔اور مودی سرکار کو ان اقدامارت سے روکیں بصورت دیگر خطے میں امن کو لائق خطرات میں خطر ناک حد تک اضافہ ہوجائے گا۔ان خیالات کا اظہار انہوں نے ایک انٹرویو میں کیا۔راجہ مشتاق منہاس نے کہا کہ پاکستان کی مسلح افواج کنڑول لائن کی دوسری جانب شہریوں اور مقامی آبادی پر فائرنگ نہیں کرتی ان کا نشانہ صرف اور صرف ہندوستان کی عسکری تنصیبات ہوتی ہیں جبکہ ہندوستان جان بوجھ کر شہریوں پر فائرنگ کرتا ہے اس کی بڑی وجہ یہ ہے کہ کنٹرول لائن کی دونوں اطراف بسنے والے کشمیری اور ورکنگ باؤنڈری پر رہنے والے سارے ریاستی باشندے پاک فوج کو اپنی فوج اور اپنی آزادی کی محافظ سمجھتے ہیں جبکہ ہندوستان کو قابض اور جارح سمجھ کر مقبوضہ کشمیرکے اندر اس کے خلاف اپنی آزادی کی جہدوجد جاری رکھے ہوئے ہیں۔انہوں نے کہا کہ کشمیرکے مسئلہ کا ایک ہی حل ہے وہ اقوام متحدہ کی قراردادوں کے مطابق رائے شماری ہے۔جس پر عملد رآمد کیلئے بین اقوامی برادری کو اپنا بھرپور کردار ادا کرنا ہوگا۔
