بولی وڈ سلطان سلمان خان کے پاس پیسوں کی کمی تو نہیں، البتہ ان کا شمار بھی دنیا کے ان افراد میں ضرور ہوتا ہے، جن کے پاس نایاب چیزوں کی کمی ہوتی ہے. سلمان خان نے بھی دیگر امیر لوگوں کی طرح دولت کے زور پر اپنے شوق پورے کرنے کی کوشش کرتے ہیں، تاہم ایک نایاب گھوڑے کو خریدنے کا ان کا شوق کروڑوں روپے کی پیش کش کیے جانے کے باوجود مکمل نہیں ہوسکا.
لو بھائی جو اپنی مختلف فلموں میں کار سے بھی تیز بھاگنے والے گھوڑوں پر سواری کر چکے ہیں، وہ ایک نایاب نسل کا گھوڑا خریدنا چاہتے تھے، جس کے لیے انہوں نے گھوڑے کے مالک کو دگنی رقم کی پیش کش کی. تاہم گھوڑے کے مالک نے پیسوں اور سلمان خان کو خاطر میں نہ لاتے ہوئے اپنا گھوڑا فروخت کرنے سے انکار کردیا. ہندوستان ٹائمز کے مطابق سلمان خان ’ثقاب‘ نامی ایک اعلیٰ نسل کے گھوڑے کو خریدنا چاہتے تھے، جس کے لیے
انہوں نے اس کے مالک کو پورے 2 کروڑ روپے کی پیش کش کی. تاہم گھوڑے کے مالک سراج خان پٹھان نے انہیں گھوڑا دینے سے معذرت کرلی. یہ پہلا موقع نہیں ہے کہ سراج خان پٹھان نے اپنا نایاب گھوڑا کسی کو فروخت کرنے سے انکار کردیا ہو، اس سے قبل انہوں نے بھارتی ریاست پنجاب کے سابق وزیر اعلیٰ پرکاش سنگھ بادل کو بھی یہ دینے سے انکار کردیا تھا. پرکاش سنگھ بادل نے سراج خان کو گھوڑے کی قیمت ایک کروڑ 14 لاکھ روپے دینے کی پیش کش کی تھی. سراج خان پٹھان کے اس نایاب گھوڑے سے متعلق خیال کیا جاتا ہے، اس طرح کے دنیا میں صرف تین گھوڑے موجود ہیں،
جن میں سے ایک امریکا اور دوسرا کینیڈا میں موجود ہے. سراج خان پٹھان کے پاس موجود دنیا کے نایاب گھوڑوں میں شمار ہونے والا یہ گھوڑا 43 کلو میٹر فی گھنٹہ کی رفتار سے دوڑنے کی صلاحیت رکھتا ہے
. یہ گھوڑا آج تک 19 ریس کے مقابلے جیت چکا ہے، جب کہ انہیں ایک مقابلے میں شکست بھی ہوئی ہے. اس گھوڑے سے متعلق کہا جاتا ہے کہ یہ دو مختلف نسل کے گھوڑوں کے ملاپ کے بعد پیدا ہوا، جس میں گھوڑی سندھ کی نایاب نسل سے جبکہ گھوڑا راجستھان سے ہوتا تھا.
