لاہور (آن لائن )سعودی عرب کے ولی عہد شہزادہ شاہ سلمان نے ترکی کے خلاف انتہائی سخت بیان جاری کرتے ہوئے کہاہے کہ ترکی ایران اور دہشتگرد گروپوں کے ’شیطانی سہ فریقی اتحاد ‘ کا حصہ ہے ۔
مصری اخبار الشروق کے مطابق سعودی ولی عہد محمد بن سلمان نے الزام عائد کرتے ہوئے کہا کہ ترکی اسلامی خلافت کو بحال کرنے کی کوشش کر رہا ہے ،جو کہ تقریبا ایک صدی قبل سلطنت عثمانیہ کے ساتھ ختم ہو گئی تھی ۔
سعودی ولی عہد محمد بن سلمان نے رواں ماہ کے آخر میں ریاض میں ہونے والی عرب سربراہی اجلاس سے قطر کو باہر رکھنے سے متعلق تاثر کو مسترد کردیا ہے تاہم دوحہ کے ساتھ سفارتی تعلقات قطع کرنے کا فیصلہ طویل رہے گا۔محمد بن سلمان نے رواں ہفتے مصر کے دورے میں مقامی مدیران سے ملاقات کے دوران یقین دہانی کروائی کہ قطر کو عرب سربراہی کانفرنس سے باہر نہیں کیا جائے گا۔
خیال رہے کہ جون 2017 میں سعودی عرب کے علاوہ متحدہ عرب امارات، بحرین اور مصر نے قطر پر دہشت گردوں کی معاونت کا الزام عائد کرتے ہوئے سفارتی تعلقات منقطع کرنے کا اعلان کیا تھا۔سعودی اتحادیوں کی جانب سے قطر پر ایک الزام ایران سے تعلقات کے حوالے سے بھی تھا جو خطے میں سعودی عرب کا بڑا حریف ملک ہے اور ان پر یمن میں حوثی باغیوں کی مدد کا الزام بھی ہے۔
شہزادہ محمد بن سلمان کی جانب سے ترکی کے حوالے سے دیے گئے بیان پر مصر میں سعودی سفارتخانے نے وضاحتی بیان جاری کیا ہے۔سفارتخانے کے اعلامیے میں کہا گیا ہے کہ سعودی ولی عہد کا بیان توڑ مروڑ کر پیش کیا گیا اور شہزادہ سلمان کا اشارہ اخوان المسلمون اور دیگر انتہا پسند جماعتوں کی جانب تھا۔
