تیز ترین نصف سنچری اور سنچری بنانے کااعزاز اپنے نام رکھنے والے جنوبی افریقی ون ڈے کرکٹ ٹیم کے کپتان اور مایہ ناز بلے باز اے بی ڈی ویلیئرز نے ون ڈے کرکٹ میں تیز ترین 9 ہزار رنز مکمل کرکے سابق بھارتی کپتان سارو گنگولی کا ریکارڈ پاش پاش کر دیا ہے. تفصیلات کے مطابق ویلنگٹن میں نیوزی لینڈ کے خلاف تیسرے ون ڈے میں اے بی ڈی ویلیئرز نے اپنا روایتی کھیل پیش کرتے ہوئے 85 رنز کی دھواں دار اننگز کھیلی اور ساتھ ہی تیزترین 9 ہزار رنز بھی مکمل کئے، انہوں نے 214 میچوں کی 205 اننگز میں یہ سنگ میل عبور کر کے 9 ہزار رنز مکمل کرنے والے جنوبی افریقہ کے دوسرے اور دنیا کے 18ویں بلے باز بننے کا اعزاز بھی حاصل کرلیا ہے . اس سے قبل یہ اعزاز بھارت کے سابق کپتان سارو گنگولی کے پاس تھا جنہوں نے 228 اننگز میں 9 ہزار رنز بنائے تھے.”مسٹر 360 “کے نام سے مشہور اے بی ڈی ویلیئرز اب تک 214 میچوں میں 54.04 کی اوسط سے 9080 رنز بناچکے ہیں جس میں 24 سنچریاں اور 50 نصف سنچریاں شامل ہیں جبکہ ان کا سٹرائیک ریٹ 100 ہے.
